ຮູ້ຈັກກັບ SWOT Analysis

ມື້ນີ້ VIPO ຈະພາມາຮູ້ຈັກກັບ SWOT Analysis ເຊິ່ງເປັນເຄື່ອງມືວິເຄາະດ້ານການຕະຫຼາດ ຈາກມະຫາວິທະຍາໄລ Harvard ປະເທດອາເມຣິກາ ໃຊ້ເພື່ອວິເຄາະປຽບທຽບທາງການຕະຫຼາດຂອງທຸລະກິດ SWOT ຫຍໍ້ມາຈາກ:

S: Strength ຈຸດແຂງ

W: Weakness ຈຸດອ່ອນ

O: Opportunities ໂອກາດ

T: Threats ອຸປະສັກ

ເຊິ່ງເຮົາຈະນຳເອົາ  SWOT Analysis ມາໃຊ້ໃນການວິເຄາະຕົນເອງເພື່ອທີ່ຈະໄດ້ຮູ້ເຖິງຈຸດດີ, ຈຸດອ່ອນ, ໂອກາດ, ອຸປະສັກຂອງຕົນເອງ ເພື່ອນຳໄປພັດທະນາ ແລະ ປັບໃຊ້ ໂດຍສະເພາະແມ່ນໃນການເຮັດວຽກ ຫຼື ການສະໝັກວຽກ ເພາະການທີ່ໄດ້ຮູ້ຈັກຕົນເອງກ່ອນຈະເຮັດໃຫ້ເຮົາໄດ້ປຽບກວ່າໃນການກຳຈັດຈຸດອ່ອນ ແລະ ດຶງຈຸດເດັ່ນຂອງຕົນເອງອອກມານຳສະເໜີ.

ໂດຍວິທີທີ່ເຮົາຈະພາມາວິເຄາະໄດ້ແກ່:

Strength ຈຸດແຂງ:

ການຊອກຫາຈຸດແຂງຂອງຕົນເອງ ແມ່ນການຊອກຫາສິ່ງເຮົາຖະໜັດ ແລະ ອາດຈະເຮັດໄດ້ດີກວ່າຄົນອື່ນ ເພື່ອທີ່ເຮົາຈະໄດ້ນຳຈຸດແຂງຂອງເຮົາໄປພັດທະນາຕໍ່ຍອດໃຫ້ດີຂຶ້ນກວ່າເກົ່າ ເຊັ່ນ:  ຈຸດແຂງແມ່ນມີຄວາມເປັນຜູ້ນຳສູງ, ກ້າສະແດງອອກ, ມີຄວາມຄິດສ້າງສັນ, ສາມາດຮຽນຮູ້ໄດ້ໄວ, ມີທັກສະການເຈລະຈາທີ່ດີ, ຄວາມອົດທົນສູງ ຫຼື ອາດຈະເປັນຄວາມສາມາດສະເພາະທາງໃດໜຶ່ງ ອາດຈະເປັນ ຄວາມສາມາດທາງດ້ານພາສາ, ຄວາມສາມາດໃນການນຳໃຊ້ເຄື່ອງມືເຕັກໂນໂລຊີ, ການອອກແບບ, ການບໍລິຫານຈັດການ ແລະ ອື່ນໆ.

ເຊິ່ງການຊອກຫາຈຸດແຂງຂອງເຮົາກໍສາມາດເຮັດໄດ້ຫຼາຍວິທີດັ່ງນີ້:

1. ການໝັ່ນສັງເກດດ້ວຍຕົນເອງ ລອງສັງເກດເບິ່ງວ່າເຮົາມັກຈະຖືກຍ້ອງວ່າເຮັດໄດ້ດີ ຫຼືວ່າສິ່ງໃດທີ່ເປັນເລື່ອງຍາກສຳລັບຫຼາຍຄົນ ແຕ່ເຮົາສາມາດເຮັດໄດ້ແບບງ່າຍໆເຊັ່ນ: ຄົນສ່ວນຫຼາຍມັກຈະບໍ່ມີຄວາມໝັ້ນໃຈໃນການເວົ້າຕໍ່ໜ້າຄົນຫຼາຍໆ ແຕ່ເຮົາສາມາດເຮັດສິ່ງນີ້ເຮັດໄດ້ດີ ຫຼື ເຮົາມີຄວາມຖະໜັດດ້ານຄະນິດສາດຫຼາຍກວ່າໝູ່ໃນຫ້ອງ.

2. ການສອບຖາມຄົນອ້ອມຂ້າງ ໂດຍອາດຈະລອງສອບຖາມຈາກຄົນອ້ອມຂ້າງເຊັ່ນ: ໝູ່ເພື່ອນ, ພໍ່ແມ່, ອ້າຍເອື້ອຍນ້ອງ ຫຼື ຄູອາຈານ ວ່າເຮົາມີຄວາມສາມາດ ແລະ ຄວາມຖະໜັດດ້ານໃດເປັນພິເສດບໍ່ ວິທີນີ້ ເໝາະສຳລັບຜູ້ທີ່ບໍ່ແນ່ໃຈວ່າສິ່ງທີ່ເຮົາຄິດກັບສິ່ງທີ່ຜູ້ອື່ນຄິດແມ່ນກົງກັນບໍ່ ເພື່ອເປັນການຕອກຍ້ຳຄວາມໝັ້ນໃຈໃຫ້ແກ່ຕົນເອງ.

Weakness ຈຸດອ່ອນ:  

ນອກຈາກການເບິ່ງເຫັນຈຸດດີຂອງຕົນເອງແລ້ວ ຍັງຄວນຈະຕ້ອງຮູ້ຈຸດອ່ອນ ຫຼື ຈຸດດ້ອຍຂອງຕົນເອງນຳ ເພື່ອທີ່ເຮົາຈະສາມາດນຳເອົາຈຸດອ່ອນເຫຼົ່ານີ້ນຳໄປພັດທະນາ, ປັບປຸງ ແລະ ແກ້ໄຂ ຈຸດອ່ອນເຫຼົ່ານີ້ໃຫ້ດີຂຶ້ນ. ເຊິ່ງຈຸດອ່ອນຂອງຄົນເຮົາກໍອາດຈະມີເຊັ່ນ: ເປັນຄົນອາລົມຮ້ອນງ່າຍ, ຂີ້ອາຍ, ບໍ່ມີຄວາມກ້າສະແດງອອກ, ຄວາມອົດທົນຕ່ຳ, ຕັດສິນໃຈຊ້າ, ບໍ່ຖະໜັດໃນການເວົ້ານຳຜູ້ອື່ນ, ບໍ່ຖະໜັດໜ້າວຽກບາງຢ່າງ...

ໂດຍເຮົາອາດຈະສັງເກດໄດ້ດ້ວຍຕົນເອງໄດ້ວ່າເຮົາມັກຈະຖືກຄົນຮອບຂ້າງຕຳໜິໃນຈຸດໃດ ຫຼື ສິ່ງທີ່ເຮົາຮູ້ສຶກວ່າຍັງເຮັດບໍ່ໄດ້ດີເທົ່າກັບຜູ້ອື່ນ ເມື່ອຊອກເຫັນແລ້ວກໍຕ້ອງເອົາຈຸດອ່ອນເຫຼົ່ານີ້ມາປັບປຸງ ແລະ ແກ້ໄຂເພື່ອຫຼຸດຈຸດອ່ອນໃຫ້ເຫຼືອໜ້ອຍທີ່ສຸດ.

Opportunities ໂອກາດ:

ການມີໂອກາດທີ່ດີກໍເປັນສິ່ງໜຶ່ງທີ່ຈະເຮັດໃຫ້ເຮົາສາມາດສ້າງຄວາມໄດ້ປຽບກວ່າຜູ້ອື່ນໄດ້ ເຊິ່ງບາງຄົນກໍມີໂອກາດຫຼາຍກວ່າຜູ້ອື່ນບໍ່ວ່າຈະເປັນໂອກາດດ້ານການສຶກສາ ເຊັ່ນ: ມີວຸດການສຶກສາທີ່ສູງ, ຈົບຈາກມະຫາວິທະຍາໄລທີ່ມີຊື່ສຽງ, ໄດ້ມີໂອກາດໄປຮຽນຕໍ່, ໄດ້ໄປແລກປ່ຽນຢູ່ຕ່າງປະເທດ ຫຼື ບາງຄົນກໍອາດຈະມີໂອກາດໄດ້ລອງເຮັດວຽກນຳອົງກອນໃດໜຶ່ງມາແລ້ວເຊັ່ນ: ເຄີຍຜ່ານການເປັນອາສາສະໝັກ, ການຝຶກງານ, ການເຮັດວຽກ Part-Time...

ເຊິ່ງການທີ່ເຮົາໄດ້ຮັບໂອກາດເຫຼົ່ານີ້ ມັນກໍເປັນສ້າງຄວາມໄດ້ປຽບໃຫ້ເຮົາຫຼາຍກວ່າຜູ້ອື່ນທີ່ບໍ່ມີໂອກາດ ສະນັ້ນ, ເຮົາຄວນຄິດວ່າຈະໃຊ້ໂອກາດທີ່ຕົນເອງໄດ້ຮັບມາສ້າງປະໂຫຍດໃຫ້ຕົນເອງໄດ້ແນວໃດແດ່? ຫຼັກໆກໍຄືຮຽນຮູ້ໃຫ້ໄດ້ຫຼາຍທີ່ສຸດ ເພື່ອນຳໄປຕໍ່ຍອດໃນສາຍອາຊີບຂອງຕົນເອງ. ບາງຄົນອາດຈະຄິດວ່າຕົນເອງນັ້ນບໍ່ມີໂອກາດ ຫຼື ປະສົບການເທົ່າຄົນອື່ນ ແຕ່ເຮົາເອງກໍສາມາດສ້າງໂອກາດໃຫ້ຕົນເອງໄດ້ເທື່ອລະເລັກລະໜ້ອຍໂດຍອາດຈະເລີ່ມຕົ້ນຈາກການຊອກຫາຄອສຮຽນອອນລາຍຟຣີ, ການເຮັດວຽກອາສາສະໝັກ, ວຽກ Part-Time ເພື່ອເກັບກ່ຽວປະສົບການເທື່ອລະໜ້ອຍ.

Threats ອຸປະສັກ:

ອຸປະສັກແມ່ນສິ່ງທີ່ເຮົາບໍ່ສາມາດຄວບຄຸມໄດ້ ແຕ່ເປັນສິ່ງທີ່ເຮົາຄວນຮູ້ໄວ້ເພື່ອທີ່ຈະພະຍາຍາມຫຼີກເວັ້ນ ເພາະສິ່ງເຫຼົ່ານີ້ອາດຈະເປັນສິ່ງທີ່ຂັດຂວາງເຮັດໃຫ້ເຮົາບໍ່ສາມາດບັນລຸເປົ້າໝາຍຂອງຕົນເອງໄດ້ ເຊິ່ງຫຼາຍຄົນກໍອາດຈະບໍ່ທັນສັງເກດເຫັນໄດ້ວ່າສິ່ງແວດລ້ອມຮອບໂຕຂອງນັ້ນເປັນອຸປະສັກແກ່ເຮົາຫຼືບໍ່ ເຊັ່ນເຮົາອາດຈະຮູ້ສຶກວ່າໃຊ້ເວລາໝົດມື້ໄປໂດຍທີ່ບໍ່ໄດ້ເຮັດຫຍັງເລີຍອາດຈະເປັນຍ້ອນເຮົາເພີດເພີນກັບການຫຼິ້ນ Social Media ຈົນເວລາຜ່ານໄປໂດຍບໍ່ຮູ້ໂຕ ຫຼື ການທີ່ສະພາບແວດລ້ອມໃນບ້ານມີສຽງດັງເຮັດໃຫ້ເຮົາບໍ່ມີສະມາທິໃນການອ່ານໜັງສື ເມື່ອເຮົາໄດ້ຮູ້ແລ້ວກໍຈະສາມາດພິຈາລະນາໄດ້ວ່າສິ່ງໃດແນ່ທີ່ເປັນອຸປະສັກແກ່ເຮົາ ແລະ ຄວນຫາທາງຫຼີກລ່ຽງອຸປະສັກເຫຼົ່ານັ້ນ.

ຫຼັງຈາກໄດ້ຄຳຕອບຄົບຖ້ວນແລ້ວເຮົາກໍຈະນຳມາວິເຄາະໃຫ້ເຫັນເປັນພາບລວມເພື່ອທີ່ຈະໄດ້ຮູ້ເຖິງຈຸດທີ່ຄວນປັບປຸງ ແລະ ພັດທະນາ ໃຫ້ດີຂຶ້ນ.

‍