4 ຢ່າງທີ່ເຮັດໃຫ້ການປະກາດຮັບສະຫມັກວຽກໜ້າສົນໃຈຂຶ້ນ

4 ຢ່າງທີ່ເຮັດໃຫ້ການປະກາດຮັບສະຫມັກວຽກໜ້າສົນໃຈຂື້ນ

ການປະກາດຮັບສະຫມັກງານເປັນເລື່ອງທີ່ຍາກກວ່າການປະກາດແນວອື່ນຫຼາຍບາງຄັ້ງຮົາປະກາດຫາຄົນມາເຮັດວຽກນຳ ແຕ່ພັດບໍ່ໄດ້ຄົນຕາມທີ່ເຮົາຕ້ອງການ ເຊິ່ງມັນອາດຈະເປັນຍ້ອນການປະກາດຂອງເຮົາບໍ່ມີຄວາມຊັດເຈນ VIPO ເຮົາຈຶ່ງນຳເອົາ 4 ວິທີດີໆມາຝາກ ເພື່ອທີ່ຊ່ວຍໃຫ້ການປະກາດຮັບສະໝັກງານຂອງທ່ານມີຄວາມຊັດເຈນ ແລະ ຫນ້າສົນໃຈຂື້ນໃນການຊອກຫາພະນັກງານ

1. ລະບຸຊື່ຕຳແໜ່ງໃຫ້ຊັດເຈນ (Job Tittle)

ສິ່ງທຳອິດທີ່ຈະດຶງດູດຄວາມໜ້າສົນໃຈຂອງຜູ້ຊອກວຽກນັ້ນຄື ຊື່ຕຳແໜ່ງ, ໂດຍປົກກະຕິແລ້ວຜູ້ທີ່ຊອກຫາວຽກຈະເບິ່ງຫາຊື່ຕຳແໜ່ງເປັນຫຼັກໃນການຊອກວຽກ; ຊື່ຕຳແໜ່ງຕ້ອງສັ້ນ ແລະ ຊັດເຈນ ເຊິ່ງໃຫ້ເຂົ້າໃຈໄດ້ເລີຍວ່າບໍລິສັດ ຫຼືອົງກອນຂອງເຮົາຕ້ອງການພະນັກງານມາເຮັດວຽກກ່ຽວກັບຫຍັງແທ້ ເພື່ອດຶງດູດຜູ້ຊອກວຽກໄດ້ຕົງຕາມທີ່ຕ້ອງການ ໂດຍການຕັ້ງຊື່ຕຳແໜ່ງທີ່ດີ ກໍຈະຊ່ວຍໃຫ້ເຮົາຫຼຸດເວລາການຊອກຫາຄົນໄດ້ຫຼາຍພໍສົມຄວນເລີຍລະ

2. ການລະບຸລາຍລະອຽດຂອງວຽກ (Job Description)

ໂດຍທົ່ວໄປແລ້ວ ຜູ້ທີ່ຊອກວຽກເອງຈະຕ້ອງການຮູ້ກ່ຽວກັບລາຍລະອຽດໜ້າວຽກຂອງຕຳແໜ່ງທີ່ປະກາດວ່າຕ້ອງໄດ້ເຮັດຫຍັງແດ່ ແລະ ພວກເຂົາກໍຈະໄດ້ຮູ້ວ່າໂຕເອງວ່າເຂົາເໝາະສົມກັບຕຳແໜ່ງນີ້ ຫຼື ບໍ່, ການລະບຸລາຍລະອຽດຂອງໜ້າວຽກລົງໃນເວລາປະກາດຮັບສະໝັກງານສາມາດເຮັດໃຫ້ຜູ້ສະໝັກສາມາດຕັດສິນໃຈໄດ້ເລີຍທັນທີວ່າເຂົາເໜາະສົມ ແລະ ສາມາດເຮັດວຽກໃນຕຳແໜ່ງນີ້ໄດ້ຫຼືບໍ່ ຫາກທ່ານຄິດວ່າການຂຽນລາຍລະອຽດໜ້າວຽກນີ້ເປັນການເສຍເວລາ ຂໍໃຫ້ລືມຄວາມຄິດນັ້ນໄປເລີຍ ເພາະວ່າ ການຂຽນລາຍລະອຽດຂອງໜ້າວຽກມັນຈະຊ່ວຍໃຫ້ຜູ້ຊອກວຽກເຂົ້າໃຈຕຳແໜ່ງນັ້ນໄດ້ເລີຍ ແລະ ຂະບວນການສັນຫາພະນັກງານກໍ່ຈະສັ້ນລົງເພາະບໍ່ໄດ້ເສຍເວລາໄປອະທິບາຍຫຍັງຫຼາຍ ແຕ່ວ່າເວລາຂຽນກໍ່ຕ້ອງໝັ້ນໃຈວ່າເຮົາຂຽນໜ້າວຽກຖືກຕ້ອງແລ້ວ ເຊິ່ງການຂຽນໃຫ້ຖືກຕ້ອງກໍ່ຈະປະກອບມີດັ່ງນີ້:

• ໜ້າທີ່ຫຼືໜ້າວຽກທີ່ຕ້ອງເຮັດໃນຕຳແໜ່ງດັ່ງກ່າວ
• ຄວາມຮັບຜິດຊອບທີ່ຕ້ອງມີ
• ຄວາມຮູ້ ແລະ ປະສົບການການເຮັດວຽກທີ່ຜ່ານມາ
• ຄວາມສາມາດພິເສດທີ່ຕ້ອງການ

ລາຍລະອຽດຂ້າງເທິງນີ້ ບໍ່ພຽງແຕ່ດຶງດູດຜູ້ຊອກວຽກໃຫ້ຢາກສະຫມັກງານເທົ່ານັ້ນ ແຕ່ຍັງໝັ້ນໃຈໄດ້ວ່າຜູ້ຊອກວຽກຈະເຂົ້າໃຈໃນຄວາມຕ້ອງການຂອງບໍລິສັດຫຼືອົງກອນເຮົາ ແລະ ຍັງຮູ້ເຖິງຄຸນສົມບັດຕ່າງໆທີ່ກຽວຂ້ອງກັບຕຳແໜ່ງທີ່ຕົນເອງກຳລັງຈະສະໝັກນຳອີກ.

3. ການລະບຸເງິນເດືອນ (Salary Range)

ເປັນເລື່ອງທີ່ຫຼາຍໆບໍລິສັດ ຫຼື ອົງກອນຍັງບໍ່ແນ່ໃຈວ່າຄວນລະບຸຊ່ວງເງິນເດືອນລົງໃສ່ປະກາດຮັບສະໝັກພະນັກງານ; ຄວາມເປັນຈິງແລ້ວ ມັນຈະມີຂໍ້ດີຫຼາຍກວ່າຂໍ້ເສຍ ເພາະການລະບຸເງິນເດືອນໃສ່ນັ້ນ ຈະສາມາດດຶງດູດເອົາຄົນທີ່ເຮັດວຽກດີ-ເຮັດວຽກເກັ່ງ ແຕ່ໄດ້ເງິນເດືອນໜ້ອຍໃນບໍລິສັດເກົ່າ ໄດ້ເຫັນໂອກາດໃຫມ່ທີ່ສະເໜີເງິນເດືອນສູງກ່ວາແບບບໍ່ຕ້ອງເສຍເວລາໄປຊອກສອບຖາມ ຍິ່ງໄປກ່ວານັ້ນ ຍັງສາມາດເປັນຕົວເລືອກທຳອິດຂອງຜູ້ຊອກວຽກຢາກເຂົ້າມາສະໝັກວຽກກ່ອນບໍລິສັດທີ່ບໍ່ລະບຸໃສ່, ແຕ່ທັງນີ້ ກໍຄວນຄຳນຶງເຖິງຖານເງິນເດືອນຂອງເຮົາເສຍກ່ອນວ່າບໍ່ໄດ້ຕ່ຳກວ່າເກນເງິນເດືອນທ້ອງຕະຫຼາດທົ່ວໄປ.

ການລະບຸຖານເງິນເດືອນທີຊັດເຈນລົງໃນເວລາປະກາດສະໝັກງານນີ້ຈະຊ່ວຍດຶງດູດເອົາຜູ້ຊອກວຽກທີ່ເກັ່ງ ແລະ ມີຄຸນນະພາບເຂົ້າມາສະໝັກວຽກນຳ ແລະ ນອກຈາກນັ້ນກໍ່ຍັງຊ່ວຍສ້າງຊື່ສຽງຂອງບໍລິສັດ ຫຼືອົງກອນວ່າເປັນອົງກອນທີ່ມີຄຸນນະພາບທີ່ເປັນມາດຕະຖານນຳອີກ

4. ການສະແດງຈຸດເດັ່ນ ແລະ ຄຸນຄ່າຂອງອົງກອນ (Company value)

ໃນປະຈຸບັນນີ້ ຫຼາຍໆບໍລິສັດ ຫຼືອົງກອນໄດ້ມີການແຂ່ງຂັນການສ້າງສື່ສຽງ, ຈຸດເດັ່ນ ແລະ ຄຸນຄ່າຂອງອົງກອນ ເຊິ່ງກໍ່ມີຫຼາຍສ່ອງທາງໃນການສ້າງເຊັ່ນ: ການໃຫ້ຄວາມສຳຄັນໃນການສົ່ງເສີມຄວາມກ້າວໜ້າໃນສາຍງານ, ການໃສ່ໃຈຊີວິດການເປັນຢູ່ ແລະ ຊີວິດການເຮັດວຽກຂອງພະນັກງານ, ການສົ່ງເສີມໃຫ້ພະນັກງານມີໂອກາດໄດ້ຮັບການຝຶກອົບຮົມທັກສະຕ່າງໆເພື່ອພັດທະນາການເຮັດວຽກໃຫ້ມີປະສິດທິພາບ. ໃນການຮັບສະໝັກງານນີ້ກໍສາມາດເປັນຊ່ອງທາງໜຶ່ງໃນການນຳສະເໜີຈຸດເດັ່ນ ແລະ ຄຸນຄ່າຂອງອົງກອນ ສະນັ້ນ ຄວນພະຍາຍາມນຳສະເໜີຈຸດດີຂອງອົງກອນໃຫ້ຫຼາຍໆ ແຕ່ຕ້ອງຕາມຄວາມເປັນຈິງທີ່ອົງກອນຂອງເຮົາສາມາດສະໜອງໄດ້.

ການຫາຄົນໃຫ້ກົງຕາມວຽກນັ້ນເປັນເລື່ອງທີ່ຍາກ ແລະ ທ້າທາຍຫຼາຍ ແຕ່ບໍ່ໄດ້ໝາຍຄວາມວ່າຈະຫາບໍ່ໄດ້ ຖ້າທ່ານນຳເຄັດລັບດ້ານເທິງນີ້ໄປໃຊ້ ການປະກາດຮັບສະໝັກງານຂອງທ່ານກໍຈະເປັນການປະກາດທີ່ສົມບູນ ແລະ ໜ້າສົນໃຈຂື້ນແນ່ນອນ.

‍