ຕ້ອງເປັນຄົນແນວໃດ ໃຫ້ຄົນທີ່ຮ່ວມງານນຳ "ຮັກເຮົາ"

“ຮັກເຮົາ ຫຼົງເຮົາ ແນະນຳເຮົາ ບອກສອນເຮົາ” ບໍ່ແມ່ນຄາຖາ ແຕ່ເປັນສິ່ງທີ່ຖ້າເຮົາເຮັດໄດ້ຈະເຮັດໃຫ້ຊີວິດການເຮັດວຽກໄປໃນທາງບວກຫຼາຍຂຶ້ນ.

‍

ມື້ນີ້ແອັດມາແນະນຳວິທີເຮັດໃຫ້ໝູ່ຮ່ວມງານຮັກເຮົາແບບທີ່ເຮົາສາມາດຝຶກຝົນ ແລະ ເຮັດໄດ້ແທ້ໆ ມາເບິ່ງກັນວ່າຈະມີຫຍັງແນ່?

‍

• ທັກທາຍສະບາຍດີກັນໃນຕອນເຊົ້າຂອງທຸກໆມື້

ສິ່ງນີ້ຈະຊ່ວຍລະລາຍພຶດຕິກຳ ແລະ ສະຖານນະການໃນບ່ອນເຮັດວຽກຕຶງຄຽດຫຼຸດລົງຕື່ມ ສະນັ້ນ, ການສ້າງຮອຍຍິ້ມ ແລະ ການທັກທາຍທີ່ດີກັບໝູ່ຮ່ວມງານ ເປັນການເລີ່ມຕົ້ນມື້ໃໝ່ທີ່ດີທີ່ສຸດ.

• ຮຽນຮູ້ສິລະປະການເວົ້າກັບຄົນອື່ນ

ຊວນໝູ່ຮ່ວມງານລົມກ່ຽວກັບຄວາມມັກ, ຄວາມສົນໃຈອື່ນໆທີ່ບໍ່ກ່ຽວກັບວຽກແນ່ ເພື່ອຈະເຮັດໃຫ້ເຂົາຜ່ອນຄາຍ ແລະ ສະບາຍໃຈເມື່ອຢູ່ໃກ້ໆເຮົາຫຼາຍຂຶ້ນ.

• ຖາມເຖິງສິ່ງທີ່ພວກເຂົາຄິດ

ຄົນສ່ວນໃຫຍ່ຈະມັກໃຫ້ຄົນອື່ນຖາມຄວາມຄິດເຫັນຂອງຕົນເອງ ດ້ວຍເຫດນີ້, ເຮົາຄວນໃຫ້ຄວາມສຳຄັນກັບການຖາມຄວາມຄິດເຫັນໂດຍອາດຈະຍົກສະຖານນະການຂຶ້ນມາຖາມ ແລະ ເມື່ອໄດ້ຮັບຄຳຕອບ ກໍກ່າວຂອບໃຈຢ່າງຈິງໃຈ (ເຖິງແມ່ນວ່າຄຳຕອບນັ້ນຈະເປັນປະໂຫຍດໜ້ອຍ ຫຼື ຫຼາຍບໍ່ກໍຕາມ).

• ຫຼີກລ່ຽງການນິນທາໝູ່ຮ່ວມງານ

ຫ້າມເດັດຂາດເລີຍ ບໍ່ວ່າຈະເປັນທັງຕໍ່ໜ້າ ຫຼື ລັບຫຼັງ ເພາະເປັນສະແດງເຖິງການຮັກສາຄວາມເຊື່ອໃຈ ແລະ ຍັງເປັນການໃຫ້ຄວາມເຄົາລົບຕໍ່ໝູ່ຮ່ວມງານນຳອີກ.

• ເມື່ອຕ້ອງລົມ ຫຼື ເຮັດວຽກກັບຄົນທີ່ເຮັດວຽກນຳຍາກ ໃຫ້ເຮັດຄືກັບວ່າ ລູກຂ້ອຍກຳລັງເບິ່ງຂ້ອຍຢູ່

ແນ່ນອນວ່າເຮົາຕ້ອງທຳໃຈ ຫຼື ຮູ້ສຶກຍາກທີ່ຈະຕ້ອງຮ່ວມງານກັບຄົນປະເພດນີ້ ບາງເທື່ອອາດຈະຫຼີກລ່ຽງໄດ້, ແຕ່ບາງຄັ້ງກໍມີເຫດໃຫ້ຕ້ອງຮ່ວມງານ ຫຼື ລົມກັນ ສະນັ້ນ, ເຄັດລັບເລັກໆນ້ອຍໆກໍຄື ເວລາຕິດຕໍ່ ຫຼື ລົມເລື່ອງວຽກກັນ ໃຫ້ເຮັດຄືກັບວ່າ ອີກຝ່າຍແມ່ນລູກຂອງເຮົາເອງ ເພື່ອເປັນການສ້າງມະໂນພາບ ໃຫ້ເຮົາຮັກສາຄວາມສຸຂຸມ ແລະ ມາລະຍາດທີ່ດີໄວ້ ຈະຊ່ວຍຫຼຸດຜ່ອນລະດັບຄວາມບໍ່ພໍໃຈກັບທັງສອງຝ່າຍໄດ້ດີ.

• ຊື່ນຊົມໝູ່ຮ່ວມງານ

ຊື່ນຊົມໝູ່ຮ່ວມງານຢູ່ສະເໝີ ເມື່ອເຮັດວຽກ ແລະ ຮັບຜິດຊອບໜ້າທີ່ໄດ້ສຳເລັດ ເພື່ອເປັນກຳລັງໃຈໃຫ້ພວກເຂົາ ພ້ອມທັງຮູ້ເວລາ ຫຼື ຈັງຫວະທີ່ຄວນຕິຊົມນຳ.

• ໃຫ້ກຳລັງໃຈໝູ່ຮ່ວມງານ

ບໍ່ຈຳເປັນຕ້ອງໃຫ້ກຳລັງໃຈພວກເຂົາຕະຫຼອດເວລາ ຄວນໃຫ້ກຳລັງໃຈເປັນປະຈຳເຊັ່ນ: ເມື່ອພວກເຂົາພົບບັນຫາທີ່ຫຍຸ້ງຍາກ ຫຼື ສິ່ງທີ່ທ້າທາຍຫຼາຍໃນການແກ້ໄຂ.

• ຕອບຂໍ້ຄວາມ ຫຼື ໂທກັບທັນທີ

ເປັນການມັດໃຈໝູ່ຮ່ວມງານດ້ວຍການມີມາລະຍາດທີ່ດີ ເພາະມັນສະແດງໃຫ້ເຫັນເຖິງຄວາມສຳຄັນຂອງເຂົາຕໍ່ເຮົາ ແລະ ຈະສົ່ງຜົນໃຫ້ການເຮັດວຽກຮ່ວມກັນງ່າຍຂຶ້ນ.

• ໃຫ້ເຄດິດ (ສ່ວນຮ່ວມ) ສະເໝີ

ຢ່າລືມໃຫ້ເຄດິດໝູ່ຮ່ວມງານສະໝີ ເມື່ອໄດ້ຮັບຄຳຊົມຮ່ວມກັນ.

• ຂໍ້ສຳຄັນສຳລັບ The boss

ຖ້າໃນມຸມຂອງການເປັນຫົວໜ້າ ຫຼື ຜູ້ນຳ ບໍ່ຄວນໃຫ້ວຽກລູກທີມໜັກເກີນຄວາມສາມາດຂອງພວກເຂົາ ສະນັ້ນ, ຫົວໜ້າກໍຕ້ອງເປັນຄົນຮູ້ປະເມີນຄວາມສາມາດຂອງລູກທີມໄດ້ດີທີ່ສຸດ.

• ເຄົາລົບເວລາຂອງຄົນອື່ນຢູ່ສະເໝີ

ເຮົາຢາກໃຫ້ຄົນອື່ນເຄົາລົບເວລາຂອງເຮົາຫຼາຍສໍ່າໃດ ຄົນອື່ນກໍຢາກໃຫ້ເປັນແບບນັ້ນບໍ່ຕ່າງກັນ, ຖ້າບໍ່ແມ່ນເວລາເລັ່ງດ່ວນ ກໍບໍ່ຄວນລົບກວນເວລາກຳລັງເຮັດວຽກຂອງກັນ ແລະ ກັນ, ຖ້າຈຳເປັນອີ່ຫຼີ ກໍຄວນຖາມ ແລະ ຂໍອະນຸຍາດກ່ອນ.

• ເຄົາລົບຄວາມຄິດເຫັນຂອງຄົນອື່ນ

ຂໍ້ນີ້ເປັນສິ່ງສຳຄັນທີ່ເຮົາສາມາດເຮັດໄດ້ໃນບ່ອນເຮັດວຽກ ເມື່ອສະເໜີຄວາມເຫັນອອກໄປ ກໍຄວນເຄົາລົບ ແລະ ຟັງຄຳເຫັນຂອງຄົນອື່ນນຳ ເພາະການໄດ້ຄຳເຫັນຈາກຫຼາຍໆຄົນສາມາດມາປັບໃຫ້ເກີດຜົນລັບທີ່ດີໄດ້. ສະນັ້ນ, ເຮົາຈຶ່ງບໍ່ຄວນປິດໃຈ, ປິດຫູ ຟັງຄຳຄິດເຫັນຂອງຄົນອື່ນ ຈົນພາດການເປີດໂລກໃນການຫາມຸມມອງໃໝ່ໆ.

‍

ທັງໝົດທີ່ເວົ້າມານີ້ບໍ່ມີຂໍ້ໃດທີ່ເຮັດໄດ້ງ່າຍໆ ເຮົາຕ້ອງໄດ້ຝຶກຝົນເອົາ ແອັດຂໍເປັນກຳລັງໃຈໃຫ້ທຸກຄົນເດີ້.

‍

ຂໍ້ມູນອ້າງອີງ: Key-Up.life

‍